काठमाडौं, पुस ०६ । फ्रेन्च फरवार्ड करिम बेन्जेमा चम्कदा रियल म्याड्रिड
ले एइवरमाथि ३–१ को सहज जित निकालेको छ । बेन्जेमा ले एक गोल गर्नुका साथै दुई गोलको लागि असिस्ट दिएका थिए ।
करिम बेन्जेमासँगै लुका मोड्रिच र लुकास भास्क्वेजले गोल गरेपछि रियलले एइवरलाई उसकै मैदानमा सहज जित हात पारेको हो । किकेले गरेको गोल सान्त्वना बन्यो । एइवरमा आइतबार राति भएको खेलमा रियलले खेलको छैटौ मिनेटमा करिम बेन्जेमाको गोलबाट अग्रता लिएको थियो ।
रोड्रिगो गोएसले क्रस गरेको बललाई बेन्जेमाले पेनाल्टी बक्समा नियन्त्रणमा लिदै सहज फिनिस गरेका थिए । १३औं मिनेटमा लुका मोड्रिचले गोल गर्दै रियलको अग्रता दोब्बर पारे । करिम बेन्जेमाले एक डिफेन्डरलाई बटि गर्दै दिएको कटब्याकलाई लुका मोड्रिचले उत्कृष्ट फिनिस गरेका थिए ।
१६औं मिनेटमा बेन्जेमा चुके । २८औं मिनेटमा किकेले गोल गर्दै खेललाई २–१ को अवस्थामा ल्याए । उनले केभिन रोड्रिगेसको पासमा गोल गरेका थिए । ३६औं मिनेटमा टोनी क्रुसको लामो पासमा बेन्जेमाले गोल गरेपनि उनी अफसाइड ठहरिदा गोलले मान्यता पाएन ।
पहिलो हाफमो इन्ज्युरी समयमा काउन्टर अट्याकमा भास्क्वेजले एइवरका गोलरक्षक डिमिट्रोभिकलाई बिट गर्दै गरेको प्रहारलाई पेड्रो बिगासले गोललाइनबाट बचाउदै रियलको थप अग्रता टारे । ६८औं मिनेटमा टोनी क्रुसको चलाखीपुर्ण पासमा रोड्रिगोले वान भर्सेस वानको अवस्थामा गरेको प्रहार गोलरक्षक डिमिट्रोभिकले खुट्टाले बचाए ।
७४औं मिनेटमा मार्को एसेन्सियोको फ्रिकिक पोस्ट नजिकैबाट बाहिरियो । ८०औं मिनेटमा योसीनोरी मुटोको हेडरलाई पेनाल्टी बक्समा सर्जियोले ह्यान्ड गर्न पुगेपनि भिएआरले उक्त ह्यान्डलाई मान्यता नदिा एइवरले बराबरीको सुवर्ण अवसर खेर फाल्यो ।
इन्ज्युरी समयको थप गरिएको पहिलो मिनेटमा कप्तान सर्जियो रामोसले पेड्रो बिगासको प्रहारलाई उत्कृष्ट ब्लक गर्दै एइवरको बराबरी टारे । इन्ज्युरी समयको थप गरिएको दोस्रो मिनेटमा करिम बेन्जेमाको पासमा लुकास भास्क्वेजले सहज गोल गर्दै रियललाई ३–१ को सहज जित दिलाए ।
ला लिगामा रियलको यो लगातार चौथो जित हो । २९ नोभेम्वरमा एलाभेससँग २–१ ले पराजित भएयता रियलले सेभिया, एट्लेटिको म्याड्रिड र एथलेटिको बिल्वाओलाई पराजित गरेको थियो ।
जितसँगै रियलले शीर्षस्थानको एट्लेटिको म्याड्रिडसँग अंक बराबरी गरेपनि गोल अन्तरमा दोस्रो स्थानमा रहेको छ । रियलको १४ खेलबाट २९ अंक पुगेको छ । शीर्षस्थानको एट्लेटिको म्याड्रिडको १२ खेलबाट २९ अंक रहेको छ । पराजित एइवर १४ खेलबाट १५ अंक जोडेर १४औं स्थानमा छ । एजेन्सी
