काठमाडौँ । पूर्वविजेता फ्रान्स युरो २०२४ को क्वार्टरफाइनलमा प्रवेश गरेको छ । सोमबार राति भएको खेलमा फ्रान्सले बेल्जियमलाई १–० गोलले हराएको हो ।
दुई महारथी टोलीबिच भएको भिडन्तमा खेलको ८५ औँ मिनेटमा सब्सटिट्युट रान्डाल कोलो मुनाइको प्रहार बेल्जियमका भेर्टोङहेनलाई लाग्दै गोलमा परिणत भएको थियो । यसअघि कप्तान किलियान एम्बाप्पेसहित फ्रान्सले थुप्रै अवसरहरू गुमाएको थियो ।
फ्रान्सको गोलअघि बेल्जियमका केभिन डी ब्रुयनाको प्रहार फ्रान्सका गोलकिपरले बचाऊ गरेका थिए । अब फ्रान्सले पोर्चुगलसँग अन्तिम ८ मा भिड्नेछ ।