झापा, फागुन १७ । प्रधानमन्त्री केपी शर्मा ओलीले देशमा विकासको लहर आएको र त्यो देखेर केही मान्छे जलेको टिप्पणी गरेका छन्।
आइतबार गृहजिल्ला झापामा ‘नेपाल-चीन औद्योगिक पार्क’ को शिलान्यास गर्दै प्रधानमन्त्री ओलीले ‘समृद्ध नेपाल, सुखी नेपाली’ सुन्दा पनि केहीका मनमा छटपटी हुने दाबी गरे।
‘केही मान्छे यो विकास देखेर जलेका छन्,’ ओलीको भनाइ छ, ‘विकासको लहर आएर जलेका छन् । देशमा समृद्धि आएकोमा जलेका छन्। ‘समृद्ध नेपाल, सुखी नेपाली’ सुन्दै उनका मनमा छटपटी हुन्छ।’
ओलीले आफूले भोट माग्दा गरेका केही वाचा सम्झिए र ती पूरा गरेको पनि दाबी गरे। आफूले गरेका वाचा सम्झदै उनले भने, ‘तपाईंहरूसँग उहिले भोट माग्दा भनेको थिएँ- तपाईंहरूले भोट दिनुहोस्। म तपाईंहरूलाई किन भोट दिएछु भनेर आत्मग्लानी हुन दिने छैन । तपाईंहरूको अनुहार मलिन हुन दिने छैन । तपाईंहरूको शिर ठडाउने छु, तपाईंहरूको शिर निहुरिन दिने छैन ।’
आफ्नो वाचा पूरा गरेको भन्दै ओलीले भने, ‘आज त्यो प्रमाणित भएको छ । पुष्टि भएको छ ।’
