बिकास घिमिरे
काठमाडौँ, साउन १ । स्पेनिस ला लिगाको उपाधि आजै छिनोफानो हुनसक्ने सम्भावना छ । आज उपाधिभन्दा एक कदम पछि रहेको रियल मड्रिडले भिल्लारियलसँग प्रतिस्पर्धा गर्दैछ ।
नेपाली समयानुसार राति १२ः४५ बजेबाट सुरु हुने उक्त खेल आफ्नो प्रशिक्षण मैदान इस्टेडियो अल्फ्रेडो डी स्टेफानोमा रियलले भिल्लारियलसँग प्रतिस्पर्धा गर्न लागेको हो ।उक्त खेलमा जित निकालेमा रियलले उपाधि आफ्नो बनाउनेछ । रियललाई उपाधिका लागि मात्र २ अंकको आवश्यक छ । शीर्ष स्थानको रियलसँग ८३ अंक रहेको छ भने उसले साविकको विजेता बार्सिलोनाभन्दा चार अंकको अग्रता बनाएको छ, समान खेल खेलेको बार्सिलोनासँग ७९ अंक रहेको छ ।
त्यस्तै रियलको प्रतिद्वन्द्वी भिल्लारियल भने ५७ अंकका साथ पाँचौं स्थानमा छ । भिल्लारियलमाथि जित निकाल्न नसके रियलले अन्तिम खेलमा १८औं स्थानको लेगानेसविरुद्ध जित निकाल्दै रियलले उपाधि जित्नेछ त्यो नि न भए अन्त्यसम्ममा रियल र बार्सिलोनाको अंक बराबरी भएको खण्डमा रियलले हेड टू हेडका आधारमा बार्सालाई पछि पार्दै उपाधि जित्नेछ ।
बार्सिलोना सेभिल्ला, सेल्टा भिगो र एथ्लेटिको मड्रिडसँग बराबरीमा रोकिएपछि उपाधि होडमा कमजोर बन्न पुगेको हो । अब बार्सिलोनाले ११औं स्थानको ओसासुना र १७औं स्थानको अलाभेससँग खेल्न बाँकी छ । कोरोना महामारीपछि सुचारु ला लिगाका पछिल्ला नौ खेलमध्ये रियलले सबै खेलमा जित निकालेको छ । यता, बार्सिलोनाले भने नौमध्ये छ खेलमा जित र ३ खेलमा बराबरी खेलेको छ ।
रियल सन् २०१६–१७ को सिजनपछि पहिलोपटक उपाधि नजिक पुगेको हो ।
यो महत्त्वपूर्ण खेलमा जित निकाल्नका लागि रियलले बलियो टोली मैदान उतार्नेछ । आजको खेलबाट लुका जोभिक मैदान फर्किँदैछन् । कोरोना भाइरसको पछिल्लो परीक्षण रिपोर्ट नेगेटिभ आएसँगै सर्बियन स्टार जोभिक रियल मड्रिडको टोलीमा फर्किएका हुन् । त्यस्तै जोभिकबाहके इडेन हाजार्ड, करिम बेन्जमा, भिनिसियस जुनियर रोड्रिगो, लुकास भास्क्वेज, ग्यारेथ बेल, मार्को एसेन्सियो, सर्जियो रामोस, फर्लान्ड मेन्डी, नाचो, इस्को, लुका मोड्रिक, टोनी क्रुस, क्यासेमिरोलगायत प्रारम्भिक टोलीमा छन् ।एजेन्सी
