काठमाडौं, असार २८ । स्पेनिस ला लिगामा साविकको विजेता बार्सिलोनाले आफ्नो २४औं जित निकालेको छ ।
शनिबार राति ३६औं खेल खेलेको बार्सिलोनाले भाल्लाडोलिडमाथि १–० गोलको जित निकालेको हो ।
भाल्लाडोलिडको मैदानमा भएको खेलमा बार्सिलोनालाई जिताउन अर्टुरो भिडालले निर्णायक गोल गरे ।
खेलको १५औं मिनेटमा उनले कप्तान लियोनल मेस्सीको असिस्टमा गोल गर्दै बार्सिलोनाई जिताए ।
निर्णायक गोलमा असिस्ट गरेका मेस्सीले भने नयाँ कीर्तिमान बनाए । मेस्सी एकै सिजन २० गोल र गोलका लागि २० असिस्ट गर्ने ला लिगाकै पहिलो खेलाडी बने ।
जितसँगै बार्सिलोनाले उपाधि होडमा रहेको रियर मड्रिडमाथि दबाब थपेको छ । शीर्ष स्थानको रियलले ८० अंक छ । रियलभन्दा एक खेल बढी खेलेको बार्सिलोनासँग ७९ अंक छ ।
कोरोना महामारीपछि सुचारु ला लिगाका पछिल्ला आठ खेलमध्ये रियलले सबै खेलमा जित निकालेको छ । यता, बार्सिलोनाले भने नौमध्ये छ खेलमा जित र ३ खेलमा बराबरी खेलेको छ ।
पराजित भाल्लाडोलिड भने ३९ अंकका साथ १४औं स्थानमा छ । एजेन्सी
