मेचीनगर, मंसीर १३ । कोरोना भाइरसको त्रासका कारण अघिल्लो शैक्षिक सत्र पुरा भएसँगै बन्द भएका मेचीनगरभित्रका निजी, सामुदायिक तथा धार्मिक विद्यालय सञ्चालन गर्न नगरका सवैपक्ष सहमत भएका छन् ।
।नेपाल सरकार शिक्षा, विज्ञान प्रविधि मन्त्रालयले कोभिड १९ को सन्दर्भमा तयार गरेको विद्यालय सञ्चालन सम्बन्धि कार्यढाँचा २०७७ ले तोकेको मापदण्ड पुरा गरी मेचीनगरभित्रका निजी, सामुदायिक तथा धार्मिक विद्यालय सञ्चालन गर्न सवैपक्ष सहमत भएका हुन् । निमित्त नगरप्रमुख मीना पोखरेल उप्रेतीको सभापतित्वमा शनिबार बसेको सर्वपक्षिय छलफलमा १ नम्बर प्रदेशसभा सदस्यहरु गोपालचन्द्र बुडाथोकी, श्रीप्रसाद मैनाली र राधा थापा लगायतको सहभागिता रहेको थियो । सो अवसरमा निमित्त नगर प्रमुख उप्रेतीले छलफलका विषयहरुको बारेमा सहभागीहरुलाई जानकारी गराउनुभएको थियो । नगरको शिक्षा शाखा प्रमुख वा नगर शिक्षा अधिकारी होमनाथ भण्डारीले मन्त्रीस्तरीय निर्णयबाट स्वीकृत भएको विद्यालय सञ्चालन सम्बन्धि कार्यढाँचा २०७७ का बारेमा जानकारी गराउनुभएको थियो ।
छलफलमा बोल्दैं संविधान सभा सदस्य रविन कोइरालाले विद्यालय सञ्चालन सतर्कता अप्नाउन जारी गरीएको विद्यालय सञ्चालन सम्बन्धि कार्यढाँचा २०७७ ले तोकेको मापदण्ड प्रभावकारीरुपमा कार्यान्वयन गर्नुपर्ने आवश्यकता औल्याउनुभयो । उहाँले दक्ष र अनुभवी स्वास्थ्यकर्मीहरुबाट विद्यार्थीहरुलाई कोभिडका बारेमा परामर्श दिनुपर्नै, हरेक विद्यालयले अभिभावकको भेला बोलाएर कोभिडका बारेमा छलफल चलाउनुपर्ने समेत बताउनुभयो । नगरभित्रका योजनाहरु पूर्णरुपमा सम्पन्न भए नगरको मुहार फेरिने भएकाले समयमै त्यस्तायोजना सम्पन्न गर्न समेत सुझाव दिनुभयो । नगरका विकास निर्माणका काम सम्पन्न गर्न आफ्नोतर्फबाट पूर्ण सहयोग हुने आश्वसन समेत संविधान सभा सदस्य कोइरालाले दिनुभयो ।
१ नम्बर प्रदेश सभा सदस्य गोपालचन्द्र बुडाथोकीले यसअघिका जानेर वा नजानेर भएका सवै त्रुटिहरुलाई सच्च्याएर अघि बढ्न जोड दिनुभयो । हरेक नगरवासीहरु जिम्मेवारी बन्नुपर्नेमा जोड दिदैं कोभिड १९ को संक्रमण नियन्त्रण गर्न हरेक नगरवासी सचेत हुनुपर्ने र अहिले अस्तव्यस्तरुपमा रहेका हाटबजारहरुलाई व्यवस्थित गर्न नगरपालिकालाइ सुझाँव दिनुभयो । अर्का प्रदेश सभा सदस्य श्रीप्रसाद मैनालीले सरकारले बनाएको मापदण्ड कार्यान्वयन गराएर मात्र विद्यालय सञ्चालन गर्न सुझाव दिनुभयो । उहाँले वडादेखि विद्यालय तथा नगरस्तरीय अनुगमन टोली बनाएर कार्यान्वयन भए नभएको अनुगमन गर्नुपर्ने बताउनुभयो । १ नम्बर प्रदेश सभा सदस्य राधा थापाले अहिले कोभिडकै कारण अभिभावक तथा विद्यार्थीहरु मारमा परेको बताउनुभयो । निर्णय गरेर कार्यान्वयन नभए ठूलो संकट निम्तिने भन्दैं बेलैमा कार्यान्वयन पक्ष मजवुत हुनुपर्ने उहाँको भनाई थियो ।
छलफलका अधिकाँश वक्ताहरुले नेपाल सरकार, प्रदेश सरकार स्थानीय तहबाट जारी गरिएका जनस्वास्थ्य एवम् सुरक्षा सम्बन्धि मापदण्डहरु पूर्णरुपमा पालना गर्ने गरी विद्यालय तथा शिक्षण संस्थाहरु सञ्चालन गर्न जोड दिएका थिए । हरेक विद्यलायले विद्यार्थीहरुका लागि हातधुने व्यवस्थाका लागि विद्यालय परिसरमा सावुन पानीको व्यवस्था, मास्क, सेनिटाइजर, ग्लोब्सको अनिवार्य प्रयोग गर्नुपर्ने समेत सहभागीले बताएका थिए । यसको उचित कार्यान्वयन भए नभएको हेर्नका लागि प्रभावकारीरुपमा अनुगमन हुनुपर्ने समेतमा सहभागीको जोड थियो । सम्बन्धित वडा कार्यालय, विद्यालय, विभिन्न दल, टोल विकास संस्थालगायतको सहभागितामा अनुगमन टोली निर्माण गर्न सहभागीको जोड थियो ।
छलफलमा जनता समाजवादी पार्टीका केन्द्रिय सदस्य धनप्रसाद गुरुङ्ग, नेपाली काँग्रेसका झापा उपसभापति राम कट्टेल, क्षेत्रीय सभापति मणिकुमार उप्रेती, नेकपा मेचीनगर कमिटी इञ्चार्ज देवकुमार राई, नगर अध्यक्ष माधवलाल अर्याल, नेपाली काँग्रेसका मेचीनगर सभापति इन्द्रबहादुर बुडाथोकी, जनता समाजवादी पार्टीका मेचीनगर अध्यक्ष ओमप्रकाश खापुङ्ग राप्रपाका मेचीनगर अध्यक्ष सुशील आचार्यलगायतले आ आफ्नो धारणा राख्नुभएको नगरपालिकाका वरिष्ठ प्रशासकीय अधिकृत अनन्तप्रकाश वस्तीले जानकारी दिनुभयो ।
