झापा, असार ७। झापाको अर्जुनधारा नगरपालिका स्थित बिरिङ नदीमा प्रतिबन्ध लगाएको समयमा समेत नदिजन्य पदार्थ उत्खनन् तथा ओसारपसार हुने गरेको पाईएको छ ।
अर्जुनधारा वडानम्बर १ मा अहिले पनि मध्यरातमा नदिजन्य पदार्थ उत्खनन् हुनेगरेको त्यहाँका स्थानिय युवाहरू बताउछन् ।
सरकारले भने असार १ गतेदेखि तीन महिनाका लागि कुनै पनि नदीबाट नदिजन्य पदार्थ उत्खनन्मा प्रतिबन्ध लगाएको छ ।
तर सरकारी नियमको बेवास्ता गर्दै तस्करहरूले गाउँलाई नै बिपत्ति पुर्याउने गरि उत्खनन् गरिरहेका छन् ।
अबैध उत्खनन् नरोकिए पछि सोमबार अर्जुनधारा १ का युवाले नदी दोहनको बिरुद्धमा वडा कार्यालयमा ध्यानाकर्षण पत्र बुझाएका छन् ।
ध्यानाकर्षण पत्र बुझाउदै तत्काल नदिजन्य पदार्थ उत्खनन् रोक्न सम्बन्धि निकायलाई चेतावनी समेत दिएका छन् ।
युवाहरुले वडा कार्यालयको बुझाएकाे ध्यानाकर्षण पत्रमा अर्जुनधारा नगरपालिका, जिल्ला प्रशासन कार्यालय र जिल्ला समन्वय समितिलाई बोधार्थ दिइएको छ ।
बिरिङ नदीमा ठुला–ठुला खाडल बनाएर खोलाजन्य सामग्री उत्खनन गरिएका कारण नदी किनारामा रहेका खेतीमा सिंचाईको असुविधा भएको उनिहरूको भनाई छ ।
१० फुटसम्म गहिरो खाडलमा पानी जमेका कारण दुर्घटनाको जोखिम बढ्नुका साथै खानेपानीको श्रोत समेत सुक्न थालेको छ ।
प्रहरी प्रशासनले उत्खनन भएको जानकारी पाएपनि नियन्त्रण तथा कारवाही नगरिएका कारण चोरी पैठारीमा संलग्नता भएको हुनसक्ने पत्रमा आशंका ब्यक्त गरिएको छ । एक स्थानियबासिका अनुसार प्रहरीहरु गस्तिमा आएपनी तस्करको घर घुमेर मात्र फर्कने गरेका छन् ।
उनी भन्छन ” जब प्रशासन नै बिक्री भएका छन् भनेर थाहा हुन्छ न्याय को आस मर्दो रहेछ ” । यसका साथै यस बिसयमा टिप्पणी गर्दै पुर्ब माननीय सांसद धर्मशिला चापागाईंले पनि युवाहरुको यस आन्दोलनमा ऐक्यबद्धता प्रकट गरेकी छन् ।
प्रशासनले नदीजन्य सामग्रीको दोहन नियन्त्रण नगरे आफुहरु शसक्त प्रतिकारमा उत्रिने चेतावनी पनि पत्रमा दिइएको छ ।
आन्दोलनमा युवाहरुको नेतृत्व गरिरहेका लक्ष्मी गौली भन्छन् “प्रथम चरणमा वडामा ध्यानाकर्षण पत्र बुझाएर नगरपालिका सहित जिल्ला प्रशासन कार्यालय र जिल्ला समन्वय समितीलाई बोधार्थ पठाएका छौं ।
सम्बन्धित निकायले आनाकानी गरेमा हामी युवाहरु आफै नै मेसिन कब्जामा लिएर कारवाही अगाडि बढाउने छौं, र त्यसबाट उत्पन्न हुने परिस्थितिको जिम्मेवार स्वयं सम्बन्धित निकाय हुने गौलीले बताए ।
