कार चढेर आयो असार १५
कार्ड भिरेर आयो असार १५ !
खादा मालामा सजिएर
पहिचान फेर्दै आयो असार १५ !
अघिल्लो साल त्यो, यस बर्ष यो नारामा
कृषी क्रान्ति भन्दै आयो असार १५ !
बर्सेनि विभिन्न पहिचान फेर्दै
यस बर्षपनि आयो असार १५ !
को सक्कली को नक्कली
चिन्नै नसकिनेगरि आयो असार १५ !
विभिन्न जातजातिको भेष बदलेर
बहुरुपि भेषमा आयो असार १५ !
पोहोर साल अतिथी अनि यसबर्ष त झन
प्रमुख अतिथीनै बनि आयो असार १५ !
आधुनिकताका चर्का नारालाउँदै
गाउँबस्ती बाट सहरपस्यो असार १५ !
खेतीयोग्य जमिनलाई प्लटिङ गर्दै
आफ्नै मौलिकता भुल्यो असार १५ !
असारे भाखा र बेठीलाई पन्साउदै
पस्चिमा सैलिमा घन्कियो असार १५ !
गमलामा धान रोपेर आयो असार १५
टेबुलमा बसि दहिचिउरामा गयो असार १५ !
पोहोर साल जस्तै
यस बर्षको असार १५ पनि !
कार चढेर आयो असार १५
कार्ड भिरेर आयो असार १५ !
खादा मालामा सजिएर
पहिचान फेर्दै आयो असार १५ !
युवराज रेग्मी
कृषि क्याम्पस मोड गौरादह नगरपालिका २ झापा
