झापा, चैत २१ । नेपाल कम्युनिष्ट पार्टी नेकपा झापाले कोरोना नियन्त्रण तथा रोकथामका लागि जिल्ला समन्वय समितिले स्थापना गरेको कोषमा एकलाख रुपैयाँ दिने निर्णय गरेको छ ।
जिल्ला अध्यक्ष चिन्तन पाठक र सचिव मणिकुमार साङपाङले शुक्रवार विज्ञप्ति जारी गरी जिससको कोषमा एकलाख रुपैयाँ दिने निर्णय भएको जनाएका हुन् । कोरोनाको उपचार तथा रोकथामका लागि जिससले ५० लाख रुपैयाँको कोष बनाएको थियो ।
कोरोना भाइरसको सङ्क्रमणबाट बच्न सरकारले देश लक डाउन गरेपछि एउटा दैनिक ज्यालादारी गरेर जीवन गुजारा चलाउने बर्गले खाद्यान्न सङ्कटको जोखिम व्यहोरिरहेको भन्दै नेकपाले आवश्यक राहतको प्रवन्ध गर्न सरकारसँग माग गरेको छ । कोरोनाको नियन्त्रण र रोकथामका लागि प्रभावकारी कदम चाल्नु अहिलेको आवश्यकता भएको भन्दै नेकपाले पार्टी पङ्क्ति मानव सेवामा समर्पित हुनु पर्ने बेला आएको जनाएको छ । भारतसँगको खुला सीमा र घनाबस्ती भएका कारण झापा कोरोनाको उच्च जोखिममा रहेको भन्दै नेकपाले पार्टीका कार्यकर्तालाई स्वयम्सेवी रुपमा परिचालित हुन पनि निर्देशन दिएको छ ।
